أنا شخصيا مصدق إن
حركة تمرد استطاعت في شهر واحد إنها تجمع 22 مليون توقيع، لأني ببساطة مضيت لهم
على 16 ورقة لوحدي، ومحتفظ بثلاثة فاضيين في البيت! أنا بصراحة مكنتش بحب أكسف حد،
إللى كنت بقابله في الشارع- سواء من حملة تمرد أو من حملة تجرد- كنت بامضيله على
طول، بس كنت بغير اسمى الأولاني، يعنى لو هما راجعوا الاستمارات ها يلاقوا إن
والدي عنده 16 ولد، كلهم مولودين في يوم واحد، وبيحملوا نفس رقم البطاقة!
أنا بحب أشجع اللعبة
الحلوة، وياسلام لو كانت فيها فكرة جديدة، وبحب أكتر إن يكون فيه أخد وعطا، يعنى
لما يكون فيه حركة زي حركة تمرد، ومايكونش فيه حركة غيرها أزعل قوى، عشان كدة فرحت
لما لقيت حركة تجرد، أهو برده الواحد لما يزهق من تمرد يلاقي حد يتابعه!
تمرد حركة شبابية
كلها شباب من اللي شاركوا في الثورة، بس كانوا مختفيين عن الأنظار وبيرتبوا للحظة
دي من قبل الثورة الأولانية، أما تجرد فهما كمان كانوا مختفيين عن الأنظار في
السجون، وبيرتبوا بردة للحظة دي، الاتنين طلعوا في الوقت المناسب، وهو دا سر
نجاحهم!
أول امبارح
دخلت في خناقة جامدة مع واحد صاحبي واخد موقف من تمرد، كان عاوز يفهمنى إن تمرد
بتكدب، وبتبالغ في الأرقام، ومجمعتش غير 170 ألف توقيع بس، لدرجة إنه وراني خبر من
بتاع الجرايد الصفرا اللي بيقول ان الهاكرز فتحوا موقع تمرد ولقوا فيه 170 ألف
توقيع بس! ساعتها قلت له حرام عليك بطلوا كدب وافترا، وبطلوا تفتشوا في ضماير
الناس، هما ناس بيقولوا احنا جمعنا 22 مليون توقيع، صدقوهم وخلاص.. كدا الدنيا
تبقى بيس!
السؤال الوحيد
اللي أنا معرفتش أرد عليه كان لما قالي: طب لما هما قدروا يجمعوا 22 مليون توقيع،
خايفين ليه من الانتخابات البرلمانية؟؟!
ليست هناك تعليقات:
إرسال تعليق