يقول المثل المصري الخالص ( ديل الكلب عمره ما ينعدل ... ولو علقو فيه قالب) يعني إيه؟! المثل عاوز يقول إن الطبع غلاب واللي اتعود علي شئ صعب إنه يغيره بسهوله..... يعني إيه برده؟! يعني مثلا صعب ان طبائع اخوانا الضباط تتغيير من يوم وليله وبدل ما كانوا بيعاملونا قبل الثوره بتعنت ومن وراء نظاره سوداء وبيكلمونا من طراطيف طراطيف مناخرهم .. صعب انهم بعد الثوره المباركه انهم يعاملونا باحترام ويبطلوا حركاتهم الاذلاليه للمواطنين...وصعب كمان انهم يتخلوا عن ادواتهم القمعيه البوليسيه مع المحتجزين وكمان المساجين...وسهل جدا انهم يختاروا الطريق السلبي في التعامل مع الجرائم والحوادث والخناقات....
ديل الكلب عمره ما ينعدل ... دا صحيح، في شعب السلبيه ملياه من ساسه لراسه ...في شعب عمل ثوره علي الفساد وهو نفسه غرقان في الفساد ....
ديل الكلب عمره ما ينعدل ....دا أكيد، الثوره قامت من اكثر من 8 شهور والبلد حالها بيسوء كل يوم عن يوم والناس مابقتش طايقه بعضها....
ديل الكلب عمره ما ينعدل... دا واضح، في معاملاتنا اليوميه مع بعضنا واللي بتثبت كل يوم تدهور أخلاقي لا مثيل له!!
أرجوا أن أكون مخطئاََ.....................
والله المستعان
محمد شحاته
ليست هناك تعليقات:
إرسال تعليق