دعوة للإضراب يوم السبت اللي جاى... طب الدعوة دي من مين؟ ولمين؟ وعشان إيه؟
الدعوة دي يا سيدي من بعض المنظمات اللي أصحابها بيتحاكموا دلوقتي بتهم كتيرة. منها تهييج وإثارة الرأي العام والتخابر لصالح دول أجنبية والعمل علي تقسيم مصر إلى دويلات صغيرة.. والدعوة دي كمان من حركات سياسية زي حركة 6 إبريل وحركة كفاية وائتلافات ثورية وصل عددها لـ أكثر من 30 منظمة وحركة.
الدعوة دي بالأساس لعمال المصانع اللي هما أصلا مضربين من أساسه عن العمل من السنة اللي فاتت واللي قبلها. وكل يوم كنا بنسمع عن إضراب وعن اعتصام وعن قطع طرق وتعطيل سكك وتخريب منشآت. طب إيه الجديد بقى. هل الإضرابات اللي فاتت كانت غير رسمية وسيادتهم بالاعلان عن اضراب 11 فبراير ها يخلوها رسمية؟!! ممكن! ليه لأ؟! كل شئ في البلد دي أصبح ممكن!
والدعوة دي ها يشارك فيها كمان طلاب الجامعات والمدارس اللي هما أصلا في أجازة نصف السنة. يعني هما مضربين من أساسه.
أما عشان إيه؟ فبصراحة أنا مش عارف! لأن واحد يقولك عشان الثورة لسه ما كملتش. والتاني يقولك عشان دم الشهدا. والتالت يقولك عشان المجلس لازم يمشي. والرابع يقولك عشان مصر... طب ازاي ... حد يفهمني لما يكون فيه إضراب مع حالة اقتصادية سئية وحالة أمنيه متدهورة وحالة سياسية مترهلة ها يكون عشان مصر !!!
المهم امبارح خرج علينا الإخوان وشيخ الأزهر والمفتي والبابا عشان يقولو "لا للإضراب" و"نعم للعمل" و"لا للعصيان المدني" و"نعم لدفع عجلة الإنتاج".وكأن خلاص يعني الإضراب مكسر الدنيا...
ياسادة نحن من نخلق العفريت ونحن من يجب علينا صرفه.
وأخيرا " الضرب في الميت حرام"
والله المستعان
محمد شحاتة
ليست هناك تعليقات:
إرسال تعليق