نفسي الأسعار ترجع تاني زي زمان... مش زي زمان قوي يعني... ممكن نقول زي من عشر سنين فاتوا.. لما كنت باركب اتوبيس الهيئة رقم 710 من المظلات لغاية الجامعة في مدينه نصر أو أتوبيس رقم 727 من شبرا لغاية الحي العاشر بربع جنيه...
ولما كنت باسمع الراجل بياع الطماطم عمّال ينادي الـ 3 كيلوا بجنيه او بتاع البلح لما كان بيقول الكيلو بجنيه وياسلام لما كانت اللحمه بـ 20 جنيه وفاكرين لما كان الخمس بيضات بجنيه....
الله يرحمك ياجنيه!!
نفسي المرتب يكفيني لغايه يوم 23 في الشهر .... يعني لما الواحد يفكر سبع ايام احسن ما يفكر 30 يوم وكمان عشان الواحد ما ينساش ايام الكرب دي!!
نفسي يطبقو قانون الغدر علي العدد مليون والعدد مليار - أنا حاسس إنهم من الفلول- ومبقيتش أطيق أسمع اسمهم ...ممكن عشان معنديش أو مفيش أمل أن أجمعهم!!!
الله يرحمك يا جنيه!!
نفسي بدل ما كل يوم عمالين ننم ونغتاب في الأسعار وارتفاعها وعمالين ناخد سيئات علي الفاضي... نفسي بقا يجي اليوم اللي ندور علي فقير او شحات نديله صدقه ... ومنلاقيش!!!
والله المستعان
محمد شحاته
ليست هناك تعليقات:
إرسال تعليق