الحمارة هي السبب!

محمود ابن عمى وهو راجع من الغيط ، حمارته الغشيمة شافت كيس بلاستك أسود؛ فخافت منه؛ فقلبت حمل البرسيم على الأرض! محمود اتجنن! مسك الحمارة ضربها! الحمارة حبت تنتقم منه، قامت رفسته في رجله اليمين، كسرتها! محمود قعد من شغله في المصنع، ومبقاش يروح الغيط كمان، وكل ما يفتكر اللي حصله يدعى على الحمارة ويقول هي السبب!

مرات محمود كل ما حد يسألها عن محمود تقوله " منها لله الحماره هي السبب"! إبراهيم بن محمود متضايق جدا من الحمارة، كل ما يشوف رجل أبوه في الجبس يجرى على الزريبة ويحدف الحمارة بالطوب ويقولها " اخرسي انتى السبب"

جيران محمود كل ما يعدوا من قدام بيته يدعوا ربنا انه يشفى محمود ويهديله حمارته!

(بس) أنا بصراحة مش عارف شعور الحمارة إيه، (بس) أكيد هي زعلانه جدا لأنها كسرت رجل محمود اليمين (بس)!