إتقل يا شعب الكبير جاي
من حوالى أسبوع شوفت كام إعلان كده على
طريق المحور مكتوب عليه (اتقل يا شعب الكبير جاي). بصراحة فكرت ان دا إعلان شيبسي
أو إعلان بيبسي أو إعلان دولسي، بعد شوية تفكير في اللي مكتوب لقيت إنه مش ممكن
يكون الكلام ده دعاية لمنتجات محترمة زي شيبسي أو
بيبسي أو حتى دولسي، دا أكيد إعلان عن الجزء التالت لمسلسل الكبير بتاع
أحمد مكى. بس رجعت وقلت لنفسي لأ مش ممكن طبعا يكون الإعلان دا عن المسلسل ، لأن مسلسل
أحمد مكى اسمه الكبير قوي، مش الكبير جاي.
يا ترى مين الكبير جاي ده؟
و سألت واحد صاحبي:
إذا كان الاعلان ده مش إعلان منتج
ولا إعلان مسلسل ها يكون إعلان إيييييه؟
صاحبي قالي: إقرأ الإعلان كويس
وانت تعرف هو لمين!
بصيت للإعلان، وبدأت أقرأ الكلمات مرة تانية، بس
بعين المتفحص.. إتقل، يا شعب، الكبير، جاي!
كلمة إتقل كلمة عامية بتستخدم كتير
في الحب، تلاقى الشاب تقلان على حبيبته، لما بيلاقيها ملهوفه عليه، أو العكس.
كلمة يا شعب كلمة كترت كتيير اليومين دول،
وبتستخدم كتير مع الشعب الوطنى اللي بيكره الإخوان كتير!
كلمة الكبير كلمة قديمة من أيام محمد على وعلى بك الكبير، وسمعتها كتير في مسلسل
أحمد مكي وهو بيقول أنا الكبير!
كلمة جاي مش عارف بصراحة دي فعل، ولا صفة
للكبير، ولا مفعول لأجله!
ع العموم كله ها يبان، والمشكلة عندي
مش في الإعلانات، المشكلة في مين اللي بيصرف عليها؟!
ليست هناك تعليقات:
إرسال تعليق