إحنا شعب وإنتو شعب

فاكرين رد الفعل على جملة (أهلى وعشيرتي) لما الرئيس مرسى نطق بيها في أول خطاباته؟  أفكركم: من أولها إقصاء! دا بيتكلم بس عن أهلو وعشيرتوا، دي جماعة إقصائية، فاشية، نازية، صهيونيه، عالميه، وأي حاجة!

طب فاكرين لما صبحي صالح قال ( الإخواني لا يتزوج إلا من إخوانية)! ساعتها الدنيا قامت ومقعدتش!!

امبارح ظهرت أغنية لعلى الحجار( إللى بحب صوته وأغانيه وخصوصا أغاني زي عم بطاطا وهنا القاهرة) الأغنية دي اسمها  إحنا شعب وانتو شعب، الاغنية من تأليف مدحت العدل ومش عارف ألحان مين!، أنا مش ها أعلق على الأغنية لأن فيه ناس كتيرة علقت عليها ومن ضمن التعليقات الكتيرة دي فيه تعليقين عجبوني جدا، حبيت إنى أقتبسهم!

والآن مع القصيدة الأصلية:-

إحنا شعب وإنتو شعب

واللى هز القلب منا

عمره ماهزلكو قلب

رغم إن الرب واحد

لينا رب... وليكو رب

......................

وردة برية وبراءة..

إحنا بنشوف الطفولة

وإنتو شايفينها سبايا

تثبتوا بيها الفحولة

إحنا يسعدنا خيالها..

لما ترسم ف الكتاب

وإنتو لو عدى خيالها

يطلعلكوا فى ثانية ناب

إنتو بتحبوا الجهامة

وإحنا بنحب ابتسامة

إحنا حرية وكرامة

وإنتو سجن وشرع غاب

إحنا شعب وإنتو شعب

........................

مصر بالنسبه لنا ثومة

والا ناصر.. أو حليم

مصر بالنسبه لكو خيمة

أو إمارة أو حريم

إحنا نفديها بحياتنا

ونحبها ونرضى بقليلها

وإنتو عايزين تنهبوها

وتسرقوا خيرها ونيلها

إحنا يسقط منا شهدا

زينة الدنيا وشبابها

وإنتوا قلتوا كنتوا سعدا

لما داسوا فوق ترابها

إحنا أقرب وإنتوا بعدا

إحنا ثورة وإنتو ردة

ياطابور خامس وقاعدة

للعدو الواقف ببابها

إحنا شعب وإنتو شعب

.............................

إحنا بنشوف ربنا

رحمة للعبد اللى تاه

عفو عن مخطئ مسىء

توبة أو طوق للنجاة

وإنتو تِعبان القبور

والمقارع للحريم

سد باب الرحمة غية

واللى يغلط ف الجحيم

واللى يضحك يبقى كافر

والعبوس آخره النعيم

إحنا بنحب الحياة

وإنتو أعداء الحياة

إحنا شعب وإنتو شعب

............................

إحنا بنشوف الحقيقة

والعقيدة ف أى دين

كنت قبطى أو يهودى

والا ضمن المسلمين

رب واحد... معنى واحد

الرسالة يا مؤمنين

ماتكدبوش ماتغيروش

ف النوايا والوشوش

حب جارك زى أهلك

احفظه ولا تخونوش

وإنتو تيجو تخونوه

يختلف ف الرأى عنكو

تحلوا دمه وتقتلوه

وتقولوا ديننا قالنا

أى دين يا أدعيا

والا نبى م الأنبيا

يأمر بكافر تصلبوه

والا بوذى تبهدلوه

والا شيعى تكفروه

واللى بيفكر دا ضال

وتحرموا حتى الحلال

وتحللوا فكر الضلال

وتحكمونا يا أغبيا

إحنا شعب وإنتو شعب

...........................

إحنا شايفين الرسول

رحمة مهداة للبشر

سعى من أجل الوصول

للكمال المنتظر

إحنا شايفين إن ديننا

دعوة للنور والحضارة

وإنتوا حاصرينه ف حكاية

توب قصير أو ستارة

إحنا شايفين ابن سينا

وابن رشد والحسين

وإنتوا شايفين ابن لادن

والكهوف المظلمين

إحنا عشاق الإرادة

والحقيقة واليقين

وإنتو تجار المنابر

والبخور والمجذوبين

الخادعين للخاضعين

والآكلين الشاربين

النازلين الصاعدين

للمصالح والمناصب

وأما أمريكا بتأمر

تصرخوا بقولة آمين

إحنا شعب وإنتو شعب

.............................

إحنا مصرى بسيط وراضى

عسكرى جاى م النجوع

يسمع الراديو الصغير

الأدان يملاه خشوع

يدعى ف الليل للى خلقه

يحمى عيلته يزيد ف رزقه

ف الدعا تنزل دموع

عند رب العالمين

صادقة من غير فلسفة

لا صوت جهورى ف ميكروفون

يصرخ يهدد بالوعيد

وكأنه واخد م السما

توكيل يكفر بعضنا

يهدينا نرجع مسلمين

يا عم مااحنا مسلمين

ومؤمنين وموحدين

من قبل حتى ما تتولد

وإحنا اللى وحدنا الإله

قبل الديانة ما تتوجد

ولإن مصر المؤمنة

قبل التاريخ فى دمنا

عمرنا ما حنبقى زيك

ولا أنت حتكون زينا

لِمّ غنمك أو جمالك

أو مباخرك أو عيالك

والمشانق من حبالك

والعشيرة والخيام

خد زعيقك خد صريخك

خد فتاويك واللجام

خد حرام حرام حرام

حلال عليك يا مسيلمة

اللى سرقته مننا

وإبعد بعيد عن أرضنا

لأنكوا... ولإننا

إحنا شعب......وإنتو شعب

التعليق الأول (منقول)

احنا شعب وانتوا شعب
احنا خدنا العفه رايه
والشرف مبدأ وغايه
وانتوا شعب من العرايا
واعتبرتوا الجنس حب
احنا شعب وانتوا شعب

احنا ناس طالبين سلام
عدل ..رحمه ..مش كلام
انتوا ناس رافعين سلاح
واحنا ناس بنقول يارب
احنا شعب وانتوا شعب

مصر بالنسبالنا ازهر
مصر فى القرآن كنانه
مش مجرد اوضه تسهر
فيها بين احضان فلانه
مصر يوسف والخليل
ارض ربى وهبها نيل
احنا عايزين خيرها ليها
وانتوا نازلين فيها نهب
احنا شعب وانتوا شعب

احنا شعب المؤمنين
بالكتاب ورسول أمين
غيرنا رب العزه قاله
ليكو دين ولينا دين
احنا ايوا تابعين
للنبى الهادى الامين
قولى انتوا فكركم
رأيكم ..تابع لمين

احنا سجده تزيل همومنا
او جلسه وسط الصالحين
وانتوا رقص وليل ومغنى
وسط حبة مخمورين
احنا بتزورنا الملايكه
وانتوا شلة شياطين
احنا شعب وانتوا شعب

احنا ندعو للايمان
تتفتح لينا السجون
وانتوا تدعو للشيطان
والزنا ....وللمجون
عشان يعيش امثالكوا لازم
نتقتل من غير أى ذنب
احنا شعب وانتوا شعب

لحظه
قولى مين كفر فى مين
مين فتى بالقتل فيها
اللى فوق دماغه بطحه
لازم بيحسس عليها

التعليق الثاني:-

Sarah Ibrahim بعد ما قام النظام باستخدام الإعلام للتأسيس لمنظومة فكرية يعتمد عليها لقهر أو قتل فئة في المجتمع طلعت علينا أغنية علي الحجار العنصرية اللي بتتعارض مع الحس السليم عند عامة الناس،،الأغنية بتدعو لنبذ الآخر بشكل مطلق لا يقبل المراجعة،،،هنلاقي قريب عندنا في مصر لو استمر المشهد بالشكل ده فئة اسمها "المنبوذين" مش هيسمح ليهم الاختلاط إلا بأبناء جماعتهم أو من يؤيدوهم أو حتى يبدون قدر من التعاطف معهم،،،في المجتمع الإغريقي القديم كان المجتمع مقسم لطبقين طبقة أصحاب الحقوق والواجبات كانوا يعيشون داخل الأسوار ومن كانوا يعيشون خارجها كان من نصيبهم النبذ السياسي والاجتماعي والقانوني،،،،هل هما عاوزين النموذج ده في مصر؟!!! عاوزين يمارسوا قهر سياسي واقتصادي وقهر مجتمعي كمان!!! الأغنية عاوزة توصل لإيه: انتوا كنتوا بتدوا زيت وسكر للشعب وعشان كده أصبحتوا كائنات أخرى لا يحق لكم أن تتساووا بنا!! مش بعيد زي ما الطفل الإسرائيلي بيشربوه العنصرية الصهيونية اللي نتيجة ليها بيتمنى الموت للطفل الفلسطيني والإصابة بالأمراض ينشروا الوباء العنصري ده بين أطفالنا في المدارس.