6 ساعات يا مفتري
وزير "قطع
الكهربا" بيبشرنا إن الصيف اللي جاي ها يكون جهنمى بامتياز، 6 ساعات يوميا من
غير كهربا!
بصراحة كَتَّر
خير الراجل، بينبهنا قبلها علشان كل واحد ياخد باله، ويعمل احتياطاته، وما يبقاش حد
عنده أيوتها حجة!
أنا عن نفسي
بدأت أستعد لليوم ده. فدخلت على النت أبحث في جوجل عن أفضل وسيلة لحل مشكلة
الكهربا، لقيت واحد مخترع جهاز سحرى بيولد كهربا تشغل كل أجهزة البيت لمدة 15 يوم
(دا أقل واجب)، من غير بنزين ومن غير جاز، يا سلام! لأ ومش كده وبس، دا كهربته ما
بتكهربش أصلا، ولو مش مصدقنى ادخل على الرابط ده:
بصراحة الاختراع
ده ما دخلش في دماغي وقلت أكيد ها يطلع اشتغالة زي اختراع الكفته! أنا عايز طريقة
واقعية!
بس هيا دي،
وجدتها: كيف تصنع شمعة من الزبدة؟ زبدة؟!؟ طب ما هو لو أنا عندي زبدة مش ها يبقى
عندي مشاكل من أساسه!
أنا ها شوف
طريقه أرخص!
وبدأت أبحث عن
طريقة أرخص، ولقيت خبر منشور على صفحة "إم بي سي أون لاين". الخبر
بيقول:- " عشر فوائد لانقطاع الكهروباء". يا فرج الله! قطع الكهربا له
فوائد يا جداعان. وانشرح صدرى، وانتفش شعرى، واغرورقت عيناي، وتنفست الصعداء،
وبدأت أقرأ المقال:
"إذا كنت تعاني من انقطاع
التيار الكهربائي فيجب عليك مشاهدة تلك النصائح الغالية التي يحتاجها كل المصريين
لتخطي مشكلة إنقطاع الكهرباء المتكرر مع الاستمتاع بحياتك وكأن شيئا لم يكن.
الفائدة الأولى: الاستماع
إلى الموسيقى.... (طب ازاي والكهربا مقطوعة.. وبطارية الموبايل ما بتستحملش أكتر
من ساعتين )
الفائدة الثانية: استرجاع
ذكريات الماضي مع أسرتك الصغيرة .... ( كل مرة؟!!)
الفائدة الثالثة: دعم
تجارة الشموع في مصر..... ( هههه ضحكة خليعة)
الفائدة الرابعة: أكل
الشيكولاته المفضل إليك.....
(كمان ضحكة خليعة)
الفائدة الخامسة: الاستماع إلى الراديو......
( طب ردوا انتو بقى)
الفائدة السادسة: الاتصال بالأقارب والاطمئنان عليهم..
( دي ماشي)
الفائدة السابعة: الاستحمام في هدوء
وسكينة..... ( ضحكة من إياهم)
الفائدة الثامنة: تقليل فاتورة
الكهرباء..... ( طب ما احنا بنشترى شمع)
الفائدة التاسعة: الخروج من المنزل
واستكشاف أماكن جديدة في مصر ... (ولما يقطع بالليل؟!!)
الفائدة العاشرة: التخلص من الضيوف
ثقيلى الظل.... أه والله العظيم الكلام ده مكتوب... ولو عاوز تتأكد منه ادخل على الرابط ده:
ليست هناك تعليقات:
إرسال تعليق