مظاهرات نظيفة

بلادي وإن جارت على عزيزة ... وأهلى وإن ضنوا على كرام

بلدنا حالها في النازل، اقتصاد ضايع، وسياحة واقفة، وتعليم مات اكلينيكيا، وشباب بيتقتل، وبنات بتتسجن، وزبالة ماليه الشوارع، وأراضي زراعية بيتبنى عليها، وأراضي صحراوية بتتسرق، وشوارع مقفولة بالباعة الجائلين، وميادين مقفولة بالمجنزرات تتفتح ساعة وتتقفل أيام، ومحطات مترو مقفولة من غير سبب، وقطارات متعطلة، وزحاااام في كل مكان، ودنيا ملعبكة لعبكة خيط السنارة، ومفيش حل قريب ولا بعيد! والمثل بيقول: اللي ما يطاوعكش طاوعه! يعنى مش ها نطاوعه قوي، نطاوعه شويه صغيرين، ودي هيا السياسة!

دول ولادنا ودي بلدنا

ميرضيش حد الدم اللي بيسيل ليل نهار ده، وميرضيش حد الانهيار اللي حاصل في البلد ده، وكلامي موجه بالأساس للمتظاهرين، إللي دمهم مش رخيص، وبلدهم غالية عليهم، وبيسمعوا الكلام!

أنا عارف إن الداخلية بتمارس أشد أنواع التنكيل ضد المظاهرات السلمية، وعارف كمان إن فيه طار بايت بين المتظاهرين والداخلية، وإن الداخلية مش عاوزة تنكسر تاني، وعشان كده بيستخدموا كل أسلحتهم عشان يقضوا ع المظاهرات، بس ربنا عرفوه بالعقل، والعقل بيقول ( لا تقف أمام القطار متحديا معتقدا أنه سوف يقف ولن يصدمك، فسائق القطار لن يفكر إلا فى سلامة الركاب من أثر التوقف المفاجئ على أن يفكر فى سلامتك)

وأنا معنديش شك من إن مظاهرات ضد الانقلاب حققت نجاحات مبهرة، أقلها كشف حقيقة الانقلاب، وانضمام شرائح كثيرة للمطالبة بإسقاطة، ولكن استمرار هذه المظاهرات بهذه الكيفية، وهي الخروج في مسيرات ورفع إشارة رابعة، وما يتبعها من  قتل واعتقال، وقنابل غاز، ومطاردات، لازم تتغيير حفاظا على الدم!

إيه رأيكم لو نعمل مظاهرات لنظافة الشوارع، أو لتنظيم المرور، أو لدهان الأرصفة، أو لتجميل الحوائط!

إيه رأيكم لو نحاول نطهر النيل من الزبالة اللي فيه، ونعمل حملات توعية، ونحاول نعلِّم الناس إزاي يتعاملوا مع نيلهم إللي هو مصدر حياتهم!

إية رأيكم لو نعمل مظاهرات نساعد بيها المحتاجين والفقراء! إيه رأيكم لو نعمل كل ده واحنا بنتظاهر برده، نخرج في مسيرات، نرفع فيها شعارات ضد الانقلاب واحنا بنضف شوارعنا، واحنا بنظم مرورنا، وبنجمل حوائطنا! وأظن لو ده حصل، ها يبقى صعب قوى على الشرطة انها تقتل وتعتقل وتضرب غاز علينا!

لو انت مع الفكرة دي ساعدنى في نشرها، ولو عندك اقتراح أو تعديل ما تبخلش عليّ بيه!